四百冬前，即塊田園                (即塊：chit-te3)
雖然有卡拋荒
生活自在，日出到黃昏              (咧：teh、leh)
啥知
渡過烏水溝的唐山客
飄洋過海的紅毛、烏鬼佮阿本客
留著眾人的跤跡                    (跤跡：kha-jiah)
語言、文化佮血統、
若像雞尾酒相透濫
安爾，台灣佮中國早就              (安爾：an2-ni；佮：kah)
「一人一家代，公媽隨人栽。       (栽：chhai7)

「唐山過台灣，心肝結規歸丸」

種種歷史的因單
唐山芋仔種佇台灣的田園            (佇：ti7)
變成一條蕃薯、一粒土豆
改良過五榖、水果…
田園內底滿滿是
台灣成做新品種的樂園
融合文化是伊的海洋的大精神
台灣互人講是中國的一部分
即款話，親像阿媽生孫─公暢的
其實，台灣佮中國早就
「日頭赤炎炎，隨人顧性命」

「殺豬無相請，嫁查某囝貺大餅」
   (殺：thai5；貺：heng7)

一百冬的新婦仔，顧人怨
父母無疼、厝邊無惜
共咱鄙相甲無一塊著                          (鄙相：phi2-siuN3)
講啥麼「鳥不語，花不香，男無情，女無義」
即碼馬煞唱聲講，咱攏是一家人，     (唱聲chhiang3-siaN)
若無相認？卜共咱捏扁佮搓圓
一寡人頭殼歹去，
「豬頭不顧，顧鴨母卵」。                 (不：m7)
半路認老父，喝講咱攏是炎黃的囝孫   (喝：hoah)
其實，台灣佮中國早就
「一代親，兩代表，三代散了了。」

「做草笠不驚日曝，做鱟杓不驚泔燙。」
(鱟杓：hau7-hia7；泔：am2)

咱的歹厝邊─中國
乞食佫下大願，想卜規碗捧
咱無卜佫做殖民地的順民
咱卜做家己的主人
一個有尊嚴的台灣人
即碼，咱愛放棄
「一盤魚脯仔─全全頭」的做法
從此，咱愛展現
「相分食有偆，相搶食無份」的腹腸。
台灣卜佇外頭徛起，咱愛
「家己栽一叢，恰贏看別人」

(撰寫於09/13/97)